فریاد فرهادی

۱۰ اردیبهشت

فریاد فرهادی

anger #مقام_معلم

سلام ای منصبی والا معلم
مقامی عالی و اعلی معلم

معلم ای دبیر اهل تدبیر
یازیبسان آیه‌ی ایثاره تفسیر
گرک سندن اولا شایسته تقدیر
کلامون قویدی عالم‌لرده تأثیر
فصاحت لفظینه معنا معلم

کیمم من دم وورام شخصیّتوندن
دئیَم شَأن و شُکوه و شوکتوندن
قلم عاجزدی یازسین رَفعتوندن
نجابت درسی آلدیم نهضتوندن
منه تَفهیم ائدن تقوا معلم

مَنیدیم مکتبونده دانش‌آموز
سنون تک تاپمادیم بیر یار دلسوز
منه خاطر تلاش ائتدون شب و روز
اولام تا عرصه‌ی دانش‌ده پیروز
متانت قافینه عنقا معلم

معلم شأنینه وار چوخ روایت
ائدیبلر (اُطلُبو العِلمی) کتابت
او کس که ائتسه ترویج دیانت
ملک ایلر اونا عرض ارادت
ائدیبدور هاردا گور مأوا معلم

مقاماتون مقام اصفیادی
کمالاتون کمال اولیادی
گوزل شُغلون مرام انبیادی
علی فرمایشی چوخ پِر بَهادی
سنی تَمجید ائدیب مولا معلم

منه بیر کلمه هر کیم ائتسه تعلیم
اونا من ایلرم فخریله تعظیم
حضور پاکووه جانیمدی تقدیم
ائدیب سندن ولیّ الله تکریم
اولوبسان رتبه‌ده اولا معلم

معلّمدن هزاران بار ممنون
آدین ظاهرده چکمور اللی کامیون
سزادور حَقّی اولسوز یرمی میلیون؟
گرک تصویب اولونسین تازه قانون
او طرحی ایلسین اجرا معلم

کیمه من ایلیوم بو دردی تَبیین
کیمه کیملر ائدور گور رتبه تعیین
ائدیبلر قشر فرهنگینی غمگین
نیه بو طرحه اولمور بودجه تأمین
اولوب فریادی واویلا معلم

اگر من دکترم یا که پرستار
سن اورگتدون منه رفتار و کردار
منی صور نشاطون ائتدی بیدار
سنون شاگردووم ای نازنین یار
ائدن کارنامه‌می امضا معلم

سن اورگتدون منه درس طبابت
گل ایندی باخ مَطبّه یوخدی نوبت
اگر باخسام مریضه نصف قیمت
گئنه سندن کئفیم سازدی حقیقت
سنون تک ائتمرم شکوا معلم

سنون شاگردووم ایندی وکیلم
وکیل زاهدان و اردبیلم
عزیزم، سن کیمی سانما ذلیلم
مَنالیم واردی خلق ایچره جلیلم
گوره بو ثروتی حاشا معلم

مینَنمیرسن پرایدا یا سَمنده
مینیر شاگردلرون شاسّی بلنده
وزیریلن گئدیر هِنده هُلنده
گئدنمیرسن ولی سن هیچ مَرنده
اولوب نیسگیللرون دریا معلم

بشر مدرکله اولماز اهل دانش
هدردی دانشون منهای بینش
خردمند ایلمز ظلمیله سازش
غریبه مکتبه تاپماز گرایش
دئمز عمرینده وانَفسا معلم

گرک نسل جوان اولسونلا هشیار
(من و تو) ضِدّ دین پخش ائدیر اخبار
کیم (اینتر نَشنالا) اولسا گرفتار
گوررسن زندگی‌سی اولدی دشوار
علاج ایلر اونا تنها معلم

بشر کی غیرت و وجدانی آتدی
حجابین غرب ائدن تَبلیغه ساتدی
قیامت عرصه‌سین یاتدان چیخاتدی
ئولونجه بستر غفلتده یاتدی
اویالدانماز اونی حَتّی معلم

شرافت‌لی بشر بَلوا یاراتماز
شرارت ایلمز دنیانی قاتماز
بئش اون گون منصبه ایمانی ساتماز
دِرایت‌سیز بشر مقصوده چاتماز
بَصیرتسیز اولار اَعمی معلم

معلم شأنیده والاگهردی
معلم علم و فَضله مُفتخردی
عملسیز علمون اولسا بی ثمردی
بِی‌ین آتسا بشر بیر پارچا شردی
بِی‌یی قالسا اولار امّا معلم

معلمدن ائدون تجلیل و تَحسین
بقای عمرینه هیچ یوخدی تَضمین
وئریبلر روحینه چوخداندی تَلقین
قالیب بیر مجلس ترحیم و تَدفین
کی اولسین عازم عقبا معلم

معلم گئتسه‌ده دنیادن، ئولمز
معلم قدرینی بیگانه بیلمز
نئجه دئم یئرده هیچ آرخا سو گلمز
کیمین ذاتی خراب اولسا دوزلمز
اونا اولسا اگر عیسی معلم

سوزی (فرهادی) چوخ بی پرده یازما
قلملن قبریوی دفترده قازما
تواضع جادّه‌سیندن گوزله آزما
یازاندا یازما من همّیشه یاز، ما
تکبّردن ائدر پروا معلم

✍ #فرهادی‌مراغه‌ای
anger @farhadi_ir

Please open Rubika to view this post

درباره ما

وبلاگ

اپلیکیشن ها